لە پێناو بەرەوپێشبردنی بواری توێژینەوەو داڕشتنی چوارچێوەیەکی هاوبەش بۆ هەماهەنگی لە بوارە ئەکادیمی و ستراتیجییەکان و خستنەگەڕی توانا و لێهاتویی کەسانی نوێ، دامەزراوەی ڤیژن بۆ لێکۆڵینەوەی ستراتیجی و زانکۆی چەرموو بە فەرمی یاداشتێکی لێکتێگەیشتنیان ئیمزا کرد.

‎لە رێوڕەسمێکدا کە لە دامەزراوەی ڤیژن بەڕێوەچو، بە ئامادەبونی ئەنجومەنی بەڕێوەبردنی ڤیژن و وەفدێک لە زانکۆی چەرموو، هەریەک لە عەدنان عوسمان سەرۆکی دامەزراوەکە و د. هەڵەت رەشید سەرۆکی زانکۆی چەرموو یاداشتێکی لێکتێگەیشتنیان ئیمزا کرد.
‎ ئامانج لە یاداشتەکە بۆ بەهێزکردنی پەیوەندی و هەماهەنگی نێوان هەردولا بو بەتایبەت لە بواری پڕۆژەی هاوبەش و سودبینین لە توانا و لێهاتویی هەردولا لە بوارە جیاجیاکاندا. 

‎هەر لە رێوڕەسمەکەدا هەردولا جەختیان لەسەر گرنگیی ئەم جۆرە یاداشتانە کردەوە لەنێوان زانکۆکان و ناوەندەکانی توێژینەوە هاوکات باس لە گرنگی زانکۆی چەرموو کرا کە لەلایەن حکومەتی فیدراڵەوە بەڕەسمی دانی پێدا نراوەو دەکرێ سود لەو دەرفەتە ببینرێت لە بەرژەوەندیی زمانی کوردی لە کەرکوک. 
‎لای خۆیەوە عەدنان عوسمان سەرۆکی دامەزراوەی ڤیژن بۆ لێکۆڵینەوەی ستراتیجی رایگەیاند: ئیمزاکردنی یاداشتی لێکتێگەیشتن لەگەڵ زانکۆی چەرموو پاڵنەر و یاریدەدەرێکی زۆر باش دەبێ بۆ بەرەوپێشبردنی هەردولا لەچەندین بواردا بەتایبەت ئاڵوگۆڕی تواناکان و ئەنجامدانی کار و پڕۆژەی هاوبەش، چونکە کارەکانی ڤیژن بەشێوەیەکی سەرەکی پشبەستوە بەو توێژینەوانەی لەلایەن مامۆستایانی زانکۆ و کەسانی ئەکادیمی ئەنجام دەدرێن