کەموکوڕیی، ئاستەنگ و ئەو هۆکارانەی وایانکردووە شانۆ لە سلێمانی گەشە نەکات، لە پانێڵێکی دامەزراوەی ڤیژن بۆ لێکۆڵینەوەی ستراتیجی باسکران، گفتوگۆ و پێشنیازەکانیش لە پۆڵسی پەیپەرێکدا وەک چارەسەر دەخرێتەڕوو.

ئەمڕۆ پێنجشەممە ٢ی تەمموزی ٢٠٢٦ پانێڵێک بەناونیشانی "کۆسپەکانی بەردەم سەرپێخستنەوەی شانۆ لە سلێمانی" بۆ بەشێک لە شانۆکاران، پسپۆڕانی بوارەکە و لایەنە پەیوەندیدارەکان بەڕێوەچوو، کە مەبەست لێی خستنەڕووی ئەو ئاستەنگ و کەموکوڕییانەبوون کە هۆکارن بۆ نەبوونی شانۆ بە کلتور و بەرەوپێشچوونی.

لە پانێڵەکەدا بەشێکی زۆریان باسیان لە نەبوونی هۆڵ و شوێنی تایبەت بە نمایشی شانۆ کرد و وتیان:" ئەوەی ئێستا نمایشی تێدا دەکرێت هۆڵی بۆنەیە نەک شانۆیی، ئەمەش وادەکات کە "هەموو نمایشێکی شانۆیی لەگەڵ کوژانەوەی رووناکییەکاندا، بمرێت". 

لایەنێکی تری گفتوگۆکان باس لە بوونی سانسۆر و پشکنینی ئەو دەقە شانۆییانە بوو، کە دەبێت بەر لە نمایش بنێردرێت بۆ دەزگا ئەمنییەکان تاوەکو پشکنین بۆ دەقە شانۆییەکان بکرێت، ئەمەش وەکو بەربەستێکی گەورەی بەردەم بەرەوپێشجوونی شانۆ لە سلێمانی باسکرا.