لە گفتوگۆیەکی کراوەى دامەزراوەی ڤیژن بۆ لێکۆڵینەوەی ستراتیجی، جەختکرایەوە له‌وه‌ى سامانی غازی هەرێمی کوردستان پێویستە بە چوارچێوەیەکی یاسایی رێکبخرێت، بۆئەوەی ئه‌م كه‌رته‌ له‌ دووبارەبوونەوەی ئەزموونەکانی کەرتی نەوت بپارێزرێت.
گفتوگۆ كراوه‌كه‌، ئەمڕۆ دووشەممە 8/6/2026 بە ناونیشانی (ئاسۆی داهاتووی کەرتی غازی هەرێمی کوردستان) بەڕێوەچوو. لە سيمينارێكدا، د. سەروەر محەمەد پوختەی توێژینەوەیەکه‌ى بە ناونیشانی (غازی سروشتی؛ لە سەرچاوەیەکی ئابوورییەوە بۆ سەرمایەیەکی ستراتیجی) پێشكه‌ش كرد کە تێیدا هەڵسەنگاندنێكى بۆ دۆخی ئێستای غاز و دەرفەتەکانی بەکارهێنانی ئه‌نجاميدابوو.
لە گفتوگۆکەدا، کە ژمارەیەک لە پسپۆڕان، شارەزایان و ئەکادیمیست بەشدارییان تێدا کرد، باس لەوە کرا کە باشترین سیاسەت بۆ سوود وەرگرتن لە سامانی غازی هەرێمی کوردستان، بەکارهێنانيه‌تى بۆ پێداویستییە ناوخۆییەکان، هەروەها داواکرا یاسایەکی تایبەت بە غاز دابنرێت، بۆ ئەوەی ئەو کێشە و ململانێیانەی کە لە کەرتی نەوت له‌ رابردوودا دروستبوو، دووبارە نەبێتەوە.
بەشداربووان باسيان له‌ بەفیڕۆدانی غاز كرد و ئاماژەیان بە ئەزموونی عێراقدا، کە بەهۆی نەبوونی دامەزراوەکانی چارەسەريى و پاککردنەوەوه‌، بەشێکی زۆری بەرهەمه‌كه‌يان ی غاز بەفیڕۆ دەچێت داوا کرا هەرێمی کوردستان پێش هەموو شتێک وەبەرھێنان لە ژێرخانی غاز و پرۆسەی چارەسەرییەکەی بکات.
جەختيش كرايه‌وه‌ کە غازی سروشتی پێویستە ببێتە بنەمای بەرهەمهێنانی کارەبا و گەشەپێدانی پرۆژە پترۆکیمیاییەکان، چونکە ئەم سامانە دەكرێت ببێتە یەکێک لە گرنگترین پایەکانی ئابووری و گەشەی هەرێمی کوردستان لە ساڵانی داهاتوودا.