لە هەنگاوێکدا بۆ قوڵکردنەوەی تێگەیشتن لە چەمکی فیدراڵی لە عێراق و گوتاری هاوبەش، دامەزراوەی ڤیژن بۆ لێکۆڵینەوەی ستراتیجی، گفتوگۆیەکی کراوەی ئەنجامدا، تیایدا پەلەمانتاران، نوسەران، مامۆستایانی زانکۆ و ئەکادیمیست و شارەزایانی بواری سەربازی ئامادە بوون.
لە گفتوگۆ کراوەکەدا توێژینەوەیەک لەلایەن د.دلاوەرعوسمان بە ناونیشانی (بەهێزکردنی سیستمی فیدراڵیی و حوکمی هاوبەش لەڕێگەی گوتاری سیاسی کورد لە بەغدا) پێشکەشکرا؛ ئاماژە بۆ ئەوەکرا لە دەستوری نوێی عێراقدا کۆمەڵێک بڕگەی تیادایە کە پێویستییان بە هەموارکردنەوە هەیە. جەختیش لە یەکخستنی گوتاری کورد لە عێراق کرایەوە.
بەشێک لە بەشداربووان باسیان لەوەکرد یەک گوتاری کورد لە بەغدا بەجۆرێک کاریگەری هەیە، کە راستەوخۆ پەیوەستە بە ژیانی هاوڵاتيیانەوە، تاوەکو کورد لە بەغدا یەکدەنگتر بێت مافە دەستورییەکانی کورد زیاتر دەچەسپێت و لەڕووی ئابوریی و داراییشەوە کاریگەريى راستەوخۆی دەبێت. ماف و شایستە داراییەکان بەردەست دەبن.
لە ئێستادا کە کابینەی نوێی حکومەتی عێراق پێکهاتووە، پرسی داهات و مووچە و بودجە لە ئایندەیەکی نزیکدا دەبێتەوە جێی مشتومڕ و گفتوگۆ، بۆیە بەشێک لە بەشداربووان پێشنیاری پێکهێنانی ژورێکی هاوبەشی نێوان سەرجەم لایەنە سیاسییەکان دەکەن، بۆ ئەوەی لە داهاتوودا یەکهەڵوێستیيان هەبێت لەکاتی دروستبوونی قەیران و ئاڵۆزییەکاندا.