دامەزراوەی ڤیژن بۆ لێکۆڵینەوەی ستراتیجی لە نوێترین توێژینەوەی خۆیدا هۆشداری دەدات لەوەی نەبوونی گوتارێکی یەکگرتووی کوردی لە بەغداد، کاریگەریی نەرێنیی لەسەر پێگەی فیدراڵیی هەرێمی کوردستان دروست کردووە و پێویستە لایەنە سیاسییەکان بۆ پاراستنی بەرژەوەندییە دەستوورییەکان، هەماهەنگیی زیاتر بکەن.
توێژینەوەکە کە لەژێر ناونیشانی (تعزيز النظام الفيدرالي والحكم المشترك عبر الخطاب السياسي الكوردي في بغداد دراسة استراتيجية) و لەلایەن د. دلاوەر عوسمان نووسراوه‌، جەخت ده‌كاته‌وه‌ کە پەرتەوازیی ناوماڵی کورد و پشتبەستنی یەکلاکەرەوە بە بودجەی گشتیی عێراق، بۆشایییەکی گەورەی لە بەردەم دەسەڵاتی هەرێم لە بەغداد دروست کردووە.
بەپێی ناوەڕۆکی توێژینەوەکە، سەرەکیترین ئەو هۆکارانەی بوونەتە هۆی لاوازبوونی پێگەی سیاسیی کورد، بریتین لە: جێبەجێنەکردنی بڕگە و ماددە دەستوورییەکانی پەیوەست بە دەسەڵاتەکانی هەرێم، هەروەها نەبوونی ستراتیجێکی ئابووریی هەمەجۆر کە بتوانێت هەرێم لە فشاری بەردەوامی دارایی رزگار بکات.
بۆ تێپەڕاندنی ئەم قۆناغە و بەهێزکردنەوەی پێگەی هەرێم، توێژینەوەکە کۆمەڵێک پێشنیازی خستووەتەڕوو وەک: یەکخستنی گوتاری سیاسی ، چالاککردنی دەستوور و سەربەخۆییی ئابووری.
لە دوای ساڵی 2003ـەوە، سیستمی سیاسیی عێراق لەسەر بنەمای فیدراڵیزم دامەزراوە، بەڵام بە درێژایی دوو دەیەی رابردوو، ناکۆکییەکانی نێوان هەولێر و بەغداد بە تایبەت لەسەر پرسی بودجە، نەوت و ناوچە جێناکۆکەکان، بوونەتە هۆی دروستبوونی گرژیی سیاسی. توێژینەوەکانی ناوەندەکانی ستراتیجیش جەخت لەوە دەکەنەوە کە یەکڕیزیی نێوان پێکهاتەکان، کلیلی سەرەکیی مانەوە و بەهێزبوونی پێگەی هەرێمە لە ناوەندی بڕیاری عێراقدا.

بۆ خوێندنه‌وه‌ى توێژينه‌وه‌كه‌ كليك له‌م لينكه‌ بكه‌ن...