به‌هۆی شڵه‌ژان و ناجێگیریی دۆخی ئێستای رۆژهه‌ڵاتی ناوه‌ڕاست و دروستبوونی شه‌ڕ له‌نێوان ئێران و ئیسرائیل و ئه‌مریكا و كاریگه‌رییه‌ نه‌رێنییه‌كه‌ی له‌سه‌ر عێراق و هه‌رێمی كوردستان؛ داوا ده‌كرێت هه‌رێمی كوردستان به‌ وردی چا‌ودێری دۆخه‌كه‌ بكات و
جۆرێك له‌ هاوسه‌نگی له‌ په‌یوه‌‌ندییه‌كانی رابگرێت.
ئه‌مرۆ چوارشه‌ممه‌، 4/3/2026 له‌ دامه‌زراوه‌ی ڤیژن بۆ لێكۆڵینه‌وه‌ی ستراتیجی، ژماره‌یه‌كی به‌رچاو له‌ شاره‌زایانی سه‌ربازی و سیاسی و كه‌سانی ئه‌كادیمی كۆبوونه‌وه‌، بۆ تاوتوێكردنی دۆخی ئێستای رۆژهه‌ڵاتی ناوه‌ڕاست و ئاینده‌ و رۆڵی كورد و هه‌رێمی كوردستان له‌م گۆڕانكارییانه‌دا، له‌ڕوووی سه‌ربازییه‌وه‌ باسی ئه‌گه‌ره‌كان كرا و ته‌واوی رێگاچاره‌ و هه‌له‌ ئه‌رێنییه‌كانی به‌رده‌م هه‌رێمی كوردستان و كورد له‌ ناوچه‌كه‌ خرانه‌ڕوو.
له‌ به‌شێكی گفتوگۆ كراوه‌كه‌دا دیدگا و بۆچوونی جیاواز له‌سه‌ر مامه‌ڵه‌كردن له‌گه‌ڵ ئه‌م دۆزه‌دا خرانه‌ڕوو، زۆرینه‌ كۆكبون له‌سه‌ر ئه‌وه‌ی كه‌ لایه‌نی كوردی ده‌بێت به‌ وریاییه‌وه‌ چاودێری بكات و به‌رژه‌وه‌ندییه‌كانی هه‌رێمی كوردستان له‌سه‌رو هه‌موو به‌رژه‌وه‌ندییه‌كان دابنرێت.
جه‌ختكرایه‌وه‌ له‌سه‌ر پێویستبوونی كاراكردنی دامه‌زراوه‌كانی هه‌رێمی كوردستان و یه‌كخستنه‌وه‌ی هێزه‌ چه‌كداره‌كان و كاراكردنه‌وه‌ی په‌رله‌مان و رێكخستنه‌وه‌ی ناوخۆی كوردستان. بۆ رووبه‌ڕووبوونه‌وه‌ی هه‌مو ئه‌گه‌رێكی چاوه‌ڕواننه‌كراو له‌ ناوچه‌كه‌دا.