تا چه‌ند ده‌رئه‌نجامی توێژینه‌وه‌ی ناوه‌ند و سه‌نته‌ره‌كانی توێژینه‌وه‌ به‌ هه‌ماهه‌نگی له‌گه‌ڵ میدیاكان ده‌گاته‌ هاوڵاتییان؟ بۆ وه‌ڵامی ئه‌م پرسیاره‌ له‌ دامه‌زراوه‌ی ڤیژن ده‌سته‌بژێرێك له‌ میدیاكاران و كه‌سانی ئه‌كادیمی و خاوه‌ن ده‌زگا میدیاییه‌كان گفتوگۆیه‌كی كراوه‌یان‌ ئه‌نجامدا و چه‌ندین سه‌رنج و پێشنیاری گرنگ ئاڵوگۆڕ كران.
گفتوگۆ كراوه‌كه‌ به‌ ناونیشانی (هه‌ماهه‌نگی سه‌نته‌ری توێژینه‌وه‌ له‌گه‌ڵ میدیاكان) ئه‌مڕۆ پێنجشه‌ممه‌ 19/2/2026 له‌ دامه‌زراوه‌ی ڤیژن بۆ لێكۆڵینه‌وه‌ی ستراتیجی به‌ڕێوه‌چوو؛ له‌گه‌ڵئه‌وه‌ی ئاسته‌نگه‌كانی ئه‌مڕۆی به‌رده‌م میدیای كوردی باسكران به‌رچاو ڕونییه‌كیش له‌باره‌ی هه‌نگاوه‌كانی هه‌ماهه‌نگیكردنی میدیاكان و دامه‌زراوه‌كانی لێكۆڵینه‌وه‌ خرانه‌ڕوو.
له‌ دانیشتنه‌كه‌دا تیشكخرایه‌سه‌ر لاوازای ئاستی هه‌ماهه‌نگی نێوان میدیاكان و توێژه‌ران له‌ بڵاوكردنه‌وه‌ی ده‌رئه‌نجام و داتای توێژینه‌وه‌كان كه‌ به‌شێكی زۆریان هه‌نگاوێكن بۆ چاره‌سه‌ری كێشه‌ گه‌وره‌كانی كۆمه‌ڵگا، پێشنیاری چه‌ند رێگه‌چاره‌یه‌كیش كران بۆ پڕكردنه‌وه‌ی ئه‌م كه‌لێنه‌.
ئه‌وه‌شخرایه‌ڕوو كه‌ له‌ئێستادا سروشتی كۆمه‌ڵگا و به‌ره‌وپێشچوونی ته‌كنه‌لۆجیا وایكردووه‌ میدیاكان به‌ ئاڕاسته‌ی زانیاریی خێرا كار بكه‌ن و به‌رهه‌مهێنانی زانیاریی ورد په‌راوێز خراوه، هه‌مووان كۆكبوون له‌سه‌ر ئه‌وه‌ی پێویسته‌ میدیاكانی هه‌رێمی كوردستان گۆڕانكاریی له‌ شێوازی كاره‌كانیان به‌ره‌و باشتر بكه‌ن‌.